Новости Воложинского района

Вторник, 30 января 2018 10:10  |  Источник  Газета "Працоўная слава"

Рэгіянальныя навіны ад члена Беларускага саюза журналістаў Наталлі Штэйнер.

Канкурэнцыя – цяжкая справа, асабліва калі канкурыраваць даводзіцца невялікім вытворчасцям з прамысловымі гігантамі. Аднак валожынскі хлеб і, у прыватнасці, батоны па-ранейшаму знаходзяць сваіх прыхільнікаў.

Аддзел прамысловасці райспажыўтаварыства заключыў дагаворы на пастаўку хлеба, бела-булачных і кандытарскіх вырабаў з фірмамі “Захад-маркет” і “3В+” у Івянцы, і літаральна на днях прадукцыя Валожынскага хлебазавода зойме сваё месца на паліцах магазінаў гэтых кампаній.

На мінулым тыдні ў Івянцы прайшоў арганізацыйны сход клуба пажылых людзей, створанага на базе Дома культуры. Узначаліла клуб вядомы і паважаны ў гарпасёлку чалавек – Марыя Пятроўна Філіповіч, што на працягу многіх гадоў загадвала мясцовым дзіцячым яслямі-садам.

Новае фарміраванне накіравана на арганізацыю вольнага часу людзей, якія знаходзяцца на заслужаным адпачынку, але жадаюць весці актыўны лад жыцця, а не сядзець дома. Назву яму далі “Івянчане”. Члены клуба абмеркавалі прыкладны план на бягучы год. Было выказана шмат прапаноў і пажаданняў: ад наведвання басейна ў Валожыне да тэатральных пастановак у Мінску, здзяйсненне экскурсійных паездак па роднай Беларусі і агульнага наведвання кінапрэм’ер. Лютаўскае пасяджэнне клуба запланавалі правесці ў мясцовым кафэ “У францішканаў”. Настаўніца Людміла Уладзіміраўна Страчынская правядзе завочную экскурсію па Івянцы. Яна паабяцала землякам адкрыць новыя старонкі ў гісторыі пасёлка, дзе ўсе жывуць шмат гадоў.

На другім паверсе раённай бібліятэкі развешаны работы ўраджэнца нашага горада мастака Уладзіміра Сайко. У міні-выставу ўвайшлі 17 карцін розных жанраў, якія адлюстроўваюць мясцовыя краявіды, людзей, што жывуць ці жылі побач.

У мінулым годзе 28-гадовы мастак скончыў поўны курс Беларускай дзяржаўнай акадэміі мастацтваў. Працуе ў жанры батальнай, сацыяльнай карціны, яму падуладны партрэты, нацюрморты і іншыя віды жывапісу. Спрабуе сябе ў кніжнай графіцы, аформіў некалькі паэтычных зборнікаў. Дарэчы, усе 17 карцін, створаных на валожынскім матэрыяле, мастак паабяцаў падарыць нашаму раёну.

З 30 студзеня па 22 лютага 10 вучняў старэйшых класаў Івянецкай сярэдняй школы па лініі чарнобыльскага аздараўлення выехалі ў рэабілітацыйны цэнтр “Зялёны Бор”, які знаходзіцца ў Салігорскім раёне і славіцца сваімі салявымі ваннамі. Івянецкія школьнікі першымі адкрылі аздараўленчы сезон у гэтым каляндарным годзе.

З 29 студзеня па 28 лютага РУП “Белпошта” праводзіць сярод насельніцтва краіны конкурс “Лепшая паштовая марка Рэспублікі Беларусь 2017 года”.

Тыя, хто пажадаюць удзельнічаць у конкурсе-апытанні, могуць азнаёміцца з выдадзенымі летась маркамі ў раздзеле “Філатэлія” на сайце www.belpost.by, а таксама ў аддзяленнях сувязі. Каляровыя плакаты з адлюстраваннем усіх паштовых марак і блокаў размешчаны на самых бачных месцах. У аддзяленнях сувязі патэнцыяльных удзельнікаў азнаёмяць і з умовамі конкурсу, правільным запаўненнем анкет. Марку-пераможцу выберуць менавіта шляхам апытання. Сярод тых, хто правільна назаве марку, будуць разыграны прызы. Дарэчы, практычна кожны год нехта з нашых землякоў робіць правільны выбар і атрымлівае прызы.

Мастацкі фільм расійскіх кінематаграфістаў “Рух уверх” пра перамогу зборнай СССР па баскетболе над амерыканскай зборнай на Алімпіядзе ў Мюнхене ў 1972 годзе б’е рэкорды ў кінатэатрах Расіі і нашай краіны таксама.

Больш за дзве гадзіны, што доўжыцца дзеянне, гледачы перажываюць буру самых розных эмоцый. У кінатэатры “Юнацтва” стужка дэманструецца з 28 снежня мінулага года. За гэты час яе паглядзелі больш за 350 гледачоў. Па шматлікіх просьбах дэманстрацыю фільма працягнулі да 11 лютага.

Прочитано 228 раз